21.9.2017 kl. 17:38

Áráttuáróðursröskun og stjórnarskrár

Sturla Jónsson sannaði í forsetakosningunum 2016 að Íslenska elítan fer ekki eftir stjórnarskránni nema í örfáum atriðum þegar henni hentar. Í hvert einasta sinn sem Forseti Lýðveldisins framselur vald sitt - eða veitir umboð - til myndunar ríkisstjórnar, brýtur hann lög Lýðveldisins.

Þetta veit Birgitta vel en hún virðist haldin áráttuáróðursröskun varðandi nýja stjórnarskrá. Hvergi hafa komið fram síðustu sjö áratugina nein haldbær rök fyrir því hvers vegna það sé nauðsynlegt að breyta stjórnarskrá Lýðveldisins.

Hvergi hefur borið á neinum samræðum né umræðum meðal þjóðarinnar um að nauðsynlegt sé að breyta stjórnarskránni og satt að segja er reynsla mín af samræðum við fólk sú að fólki þyki þessi umræða leiðinleg og flókin.

Ég hef lengi uppnefnt Lýðveldið Lýgveldi og mun gera það á meðan æðsti yfirmaður þess brýtur helgustu lög ríkisins. Mörg önnur stjórnarskrárbrot eru framin, allt að því daglega, en þegar ríkið fer að fara eftir stjórnarskránni og þegar lagalæsi verður kennt í skólum, þá fyrst getum við rætt aðal spurninguna; Hvers vegna þarf nýja stjórnarskrá?

Því næst mætti spyrja, þurfum við breytingar breytinganna vegna eða erum við búin að greina vandann og ræða tillögur til úrbóta - og þá með yfirveguðum hætti? Úlfahópurinn hefur ekki rætt stjórnarskrármál og ég á ekki von á að það verði gert. 

Svo ég komi minni eigin samsærisröskun á framfæri; Hvaða erlendu öfl þrá stjórnarskrárbreytingar, hverjir stjórna Feneyjarnefndinni og hverjir stjórna vinstri hreyfingunum?