1.5.2014 kl. 12:28
Álfar um nótt
Þegar sumardagurinn fyrsti skellur á hafa álfar oft í nægu að snúast. Þá eru fardagar álfa yfirleitt rétt afstaðnir um allt land með öllu því traðaki sem þeim fylgir. Landshlutar eru misjafnir en fréttanet huldufólks reynir að samræma all landið öllum til heilla.
Álfar hafa lengi haft þann háttinn að ferðast milli landshluta rétt í þann mund að snjóalög leysir. Ófreskt fólk til forna var oft á útkíkki þegar leið á Góu að líta til Álfaferða.
Gott er að vita hvar Álfar fara um en ekki er það alltaf ljóst því freskir sjá þá ekki og margir ófreskir vilja hvorki sjá þá né af þeim vita. Ekki að ósekju.
Þegar umferð eykst á þjóðleiðum álfa vita þeir sem vit hafa að stutt er í snjóleysingar.
Sumt fólk iðkar gönguferðir nærri þessum leiðum sem nær allar eru í sjónhendingu frá alfaraleiðum manna. Sumar leiðir og jafnvel þvergötur - eða áningarsvæði - blasa beint við hverjum þeim sem auga hefur.
Hafa þarf aðgát ef vart verður álfafarar því álfar líta manngæsku öðrum augum en menn og nær því sem náttúran telur gott og gæskuríkt. Þeir sem vanvirða álfa fá oft að sjá eftir þvi en vita sjaldan af því en þeir sem álfum er vel við hafa oft notið góðvildar þeirra.
Þeir sem þekkja álfa vita því að betra er að sýna þeim virðingu en síðri.